«أكيد أنت واحد منهم».. كريم دغيم: المستثمرين 4 أنواع وهذه نصيحتي لهم !

حدد كريم دغيم ، خبير أسواق المال ، 4انواع من المستثمرين، أعرفهم لأنك غالبا هتبقى واحد منهم .

النوع الاول

المستثمر صاحب الدخل فقط النوع ده بيحوش جزء من مرتبه وعايز يستثمر الجزء ده فى اصول علشان يقدر يواجه التضخم ومع الوقت يلاقى حاجه تساعده فى المستقبل لاى هدف هو عايزه .

ده انا بنصحه دايما فى الاستشارات المجانيه انه بعد مايطلع مبلغ الطوارئ انه يدفع قسط لعقار تجارى يقدر يأجره

يقسم الفلوس بين دهب وصناديق استثمار اسهم او يحدد ثلاث اسهم مختلفين يبتدى يحوش فبهم وطبعا بيبقى فيه نصايح اخرى حسب حاله صاحب الاستشاره ونقاط القوه بتاعته

النوع الثانى

المستثمر صاحب رأس المال النوع ده النصيحه بتبقى على حسب جاب الفلوس ازاى ونقاط القوه بتاعته وخبرته

طبعا رقم واحد بالنسبالى انه يشتغل فى مشروع بيفهم فيه ودارسه او ياخد وقته فى دراسه مشروع قبل ما يبدأ

وتانى حاجه تكوين محفظه من عقار وذهب واسهم سواء صناديق استثمار او شراء اسهم بشكل مباشر وكاش فى حساب يدر ارباح  .

المحفظه بالشكل ده بتخليه يتحرك بسهوله بين مكونات المحفظه وتوجيه الاموال للفرص الى هيلاقيها داخل كل قسم من اقسام المحفظه وطبعا المحفظه دى بنكونها بناء على امكانيات المستثمر واهدافه

النوع الثالث

هو المستثمر المضارب والنوع ده عايز الحركه بتاعته فى الاسواق تتم بشكل اسرع وطبعا هيبقى جزء من راس ماله متوجه لاسواق المضاربه سواء اسهم او اى فرص سريعه هيشوفها جوه الاسواق بصفه عامه طبعا النوع ده لازم تكون عنده خبره كبيره فى المتاجره والتداول ولازم يكون جرب بمبالغ قليله وعمل منها فلوس

النوع الاخير

بيبقى مخلط بين الانواع كلها بيقدر يتحرك بشكل سريع وعارف بيعمل ايه وكمان فى عنده جزء كبير من استثماراته طويله ومتوسطه الاجل وعارف يعنى ايه فايده الكاش

بعد الكلام ده قولى انت اى نوع من المستثمرين دول وقولى بتفكر ازاى فى الاستثمارات بتاعتك.