الاقتصاد بالبلدي.. دكتور محمد سيد يكتب| يعني أي تعويم الجنيه؟
الاقتصاد بالبلدي.. دكتور محمد سيد يكتب| يعني أي تعويم الجنيه؟
خلال الفترة الزمنية السابقة لا حديث يعلو فوق الحديث عن الاقتصاد فليس من المفترض أن نكون جميعاً خبراء في الاقتصاد ولكن مما لاشك فيه أننا جميعا اصبح لدينا الشغف بالاقتصاد وأصبح حديثنا في الاقتصاد يتقارب من حديثنا عن مبارايات كره القدم.
وأصبح الحديث عن الاقتصاد ليس مقصوراً على فئة محددة بل أصبح بين جميع الفئات الاجتماعية و العمرية والفكرية ، و من ثم رأينا أنه علينا مسئولية وطنية وعلمية في توضيح بعض المفاهيم الاقتصادية و هذا ما سنبدأ في طرحه خلال الفترة المقبلة من خلال مقال اسبوعي تحت عنوان ” الاقتصاد بالبلدي ” بغرض إيضاح بعض المفاهيم الاقتصادية ببساطة . وسنلقي الضوء في ذلك الاسبوع على معنى كلمة” تعويم الجنيه “.
ما هو تعويم الجنيه؟
تعويم الجنيه هو تحرير سعر صرف الجنيه بحيث يحدد سعره وفقاً لآلية العرض والطلب في السوق المحلية والدولية، دون أي تدخل من الحكومة ممثلة في البنك المركزي، حيث يقتصر دوره على التحكم فقط في توقيت تحرك الأسعار.و ينقسم التعويم الى نوعين:
النوع الأول: التعويم الحر
وهو تحرير سعر صرف الجنيه بكل حرية وفقاً لارتباطه بسلة من العملات مثل الدولار واليورو والاسترليني، وتحدد قيمته بناءً على حركة العرض والطلب عليه مقابل العملات الأجنبية الأخرى دون أي تدخل من الدولة أو البنك المركزي.
النوع الثاني: التعويم المدار
وهو التعويم الذي يخضع لتحكم البنك المركزي، حيث تتدخل لجنة السياسة النقدية في تحديد سعر الجنيه كلما دعت الحاجة إلى تعديل هذا السعر مقابل بقية العملات، استجابة لمجموعة من المؤشرات مثل مقدار الفجوة بين العرض والطلب في سوق الصرف، ومستويات أسعار الصرف الفورية والآجلة، والتطورات في أسواق سعر الصرف الموازية.
و من خلال استعراض تعريف أنواع التعويم ( الحر – المدار ) ويتم الاعتماد على النوع الاول من التعويم ( التعويم الحر ) في الدول الرأسمالية الصناعية المتقدمة، صاحبة عملات الدولار والجنيه الاسترليني والفرنك السويسري، ولكن في حالة الجنيه المصري قد يكون الأمر صعباً، في ظل ميزان تجاري هابط، وتراجع حاد في احتياطيات النقد الأجنبي لدى البنك المركزي، والندرة في الدولار أدى إلى شلل حركة الاستيراد وتوقف العديد من الأسواق. فيتم الاعتماد على النوع الثاني من التعويم ( التعويم المدار )
تعويم الجنيه بالبلدي
بالبلدي كده أنت عندك محل ملابس بتبيع القميص بمبلغ 250 جنيه وأنت بتشتري القميص 170 جنيه يعني كسبان 80 جنيه و بتبيع في اليوم 10 قمصان بمكسب يومي 800 جنيه يعني في الشهر بتكسب 24000 جنيه و بتدفع الالتزامات إللي عليك 10000 جنيه يعني صافي ربحك في الشهر 14000 جنيه و الدنيا زي الفل و عارف تأكل العيلين و المدام و ماشي الحال.
بعد كام متر فتح جنبك محل ملابس جديد بيبيع قميص ماركة اخرى بمبلغ 200 جنيه و الناس بتشتري منه بعد شهرين تلاتة لقيت نفسك بتبيع في اليوم 5 قمصان بس بتكسب 400 جنيه في اليوم يعني 12000 جنيه في الشهر و برضوا بتدفع التزامات 10000 جنيه يعني صافي ربحك في لشهر بقا 2000 جنيه بس.
و لأن عندك كمية كبيرة من القمصان في المخزن طبعا أنت اول حاجة هتفكر فيها تقلل السعر بتاع القميص يمكن تبيع أكتر خليت القميص بمبلغ 200 جنيه بدل من 250 جنيه و تكسب قليل و تبيع كتير و الدنيا تمشي ( بس خلي بالك أنت اتأخرت شوية في القرار ده ) المهم أنك نزلت السعر ل 200 جنيه يعني مكسبك 30 جنيه في القطعة على أمل أنك تعرف تبيع زي الأول وأكتر و لكن خلاص الناس اتعودت تجيب من المحل التاني و لما أنت نزلت السعر ل 200 جنيه برضوا مبعتش غير 5 قمصان يعني مكسبك 150 جنيه في اليوم يعني 4500 ف الشهر و التزاماتك 10000 جنيه و طبعا مش هينفع تقفل المحل أهو برضوا أحسن من مفيش و طبعا الالتزامات بتزيد عليك والبيع قليل فقررت أنك تنزل السعر أكتر و تكسب بس 10 جنيه و تبيع ب 180 جنيه و هنا ناس قليلة إللي اشتروا و باقي الناس قالت استنى شوية هو هينزل السعر تاني و بالتالي مبقاش ليك قيمة.
وآخر قرار هتاخده علشان تنقذ نفسك أنك هتبيع القميص من غير ما تحدد سعر يعني اللي هيجي يقولك هشتري القميص ب 50 جنيه هتبيع و اللي هيقولك ب 100 جنيه هتبيع و اللي هيقولك ب 200 جنيه هتبيع و تقعد أنت مع نفسك آخر الشهر تحط السعر ده على السعر ده و تحاول تعوض خسارتك و تعرف تبيع أكتر و تحاول ترجع مبيعاتك زي الاول و تحط سعر متوسط تكسب منه حتى لو قليل لغاية ماتكسب ثقة الناس و ترجع واقف على رجلك زي الأول .
طبعا لما أنت محددتش سعر و تركت السعر للعرض و الطلب و متدخلتش في الأول ده اسمه ( تعويم حر ) و لما قعدت أخر الشهر و حطيت مبلغ معين تبيع به متقلش عنه ده اسمه ( تعويم مدار )
و طبعا لو معاك فلوس في ظل تعويم الجنيه و حالة عدم الاستقرار حاول تشتري بيه دهب أو فكر في استثمار عقاري المهم متخليش معاك نقدية سائلة على الأقل خلال تلك الفترة علشان تضمن أن فلوسك قيمتها تزيد أو على الأقل تفضل زي ماهي او قريبة من قيمتها الحالية .
نبذه عن الكاتب
محمد سيد
باحث و محلل اقتصادي
– دكتوراه مهنيه في الاقتصاد
– باحث ماجستير اكاديمي في الاقتصاد جامعة الدول العربية
– دبلوم الدراسات العليا في الاحصاء جامعه القاهره
-دبلوم الدراسات العليا في الاقتصاد جامعة الدول العربية
– المستشار الاقتصادي للاتحاد العربي الافريقي للتكامل الاقتصادي
– عضو مجلس ادارة غرفة التجارة العربية الافريقية
