كريم دغيم يكتب : الاستثمار فى البورصة بقواعد سيدنا عثمان
سئل عثمان بن عفان رضي الله عنه عن ( سر غناه ) وقد هاجر إلى المدينة لايحمل إلا سيفه فقال : ( كنت أعالج و أنمي و لاازدري ربحاً و لاأشتري شيخاً و أجعل الرأس رأسين )
هنمشى هنا مع بعض واحده واحده ونشرح كل كلمة
كنت أعالج المقصود هنا أنك تقف على تجارتك وتبقى عارف كل كبيرة وصغيرة عنها وده بالظبط إلى المفروض تعمله وأنت بتستثمر فى البورصة لازم تبقى فاهم كل كبيرة وصغيرة عن حسابك وتعرف تطلع فرص وتعرف كمان هتتصرف إزاي لو وجهه نظرك طلعت صح أو طلعت غلط.
انمى هنا معناها تنميه التجارة ولو هنستخدم القاعدة دى فى الاستثمار فى البورصة هنحتاج أننا نعيد استثمار جزء من الأرباح والمحفظة على رأس المال وزيادته.
لا ازدرى ربحا عدم الطمع وزيادة هامش الربح لزياده دورة رأس المال هنا برضه هنستخدم القاعده دى فى البورصة باننا نبيع على المستهدفات بتاعتنا ومنطمعش ونراقب فرص جديدة متوافقة مع المخاطرة والعائد بتاعنا.
لا اشترى شيخا فى التجاره لا تشترى البضاعة الراكده اشترى الرائجة دائما وهنا علشان تطبق القاعده دى فى البورصه اشترى السهم اللى أحجام التداول بتاعته جيدة واتجاهه صاعد وأبعد عن الإتجاه الهابط.
أجعل الرأس راسين هنا مبدا التنويع فى المتاجره وفى الاستثمار وفى أسواق المال حاول تشترى فى أكتر من سوق وأكتر من سهم.
