مايكل نجيب يكتب: في جنون الذهب
عشان نفهم أيه اللي بيحصل في الدهب …
الشارت ده للدهب من ٢٠٢٠ لحد النهاردة …
اللي شاري من ٢٠٢٠ دهب تقريباً مكيت يعني في نفس سعره .
ولكن الكلام ده في البورصة العالمية يعني دهب مقابل دولار .
بس لو حضرتك تفتكر وقتها كان عيار ٢٤ سعره ٩٠٠ جنيه وحالياً سعره فوق ٣٠٠٠ جنيه يعني تضاعف أكتر من ٣ مرات …
ده عشان الذهب سعره زاد ؟
إطلاقاً والشارت قدامك ده في ناس مجابتش أسعار شراها في أزمة كورونا أصلاً …
طيب ليه الدهب بيزيد هنا ؟
الدهب مش بيزيد يا افندم ولكن الدولار بيزيد .
طيب ما هو ثابت في البنك ؟
روح هات من البنك .
طيب لو معرفتش أجيب ؟
هنا بقي عليك وعلي الصاغة اللي بتتحوط من سعر الدولار ومش هيحسبه بسعر البنك ولا السوق الموازي ولكن هيحسب عليه كمان العرض والطلب المحلي اللي فيه العرض ثابت تقريباً والطلب بقي جنوني .
طيب بيحسبوا الدولار بكم وهل ممكن ينزل ؟
بيحسبوه ب٥٠ ومن كام يوم ب٤٥ وممكن خبر ينزله ١٠% وخبر يطلعه ١٠% في يوم .
يعني عايز تقول أيه ؟
عايز أقول وأنت بتشتري دهب أنت مش بتدفع سعر جرام الدهب فقط لأ أنت بتدفع سعر الدولار كمان …
وأحنا عارفين أن سعر الدولار مرن يعني عندك :
سعر بنك – سعر موازي – دولار دهب – سعر اربتراج – دولار عربيات وهكذا …
وفي ٤ دولار معايا عايز ابيعهم لما يجيب ال٥٠ زي الدهب .
